Australian Open. Берреттини жароҳатга қарамай Карлос Алькаразни мағлуб этди

Турнирнинг учинчи даврасида жаҳоннинг еттинчи ракеткаси, италиялик Маттео Берреттини ҳамда АТР рейтингида 31-ўринни эгаллаб турган испаниялик Карлос Алькараз тўқнаш келишди. Тўрт соату 13 дақиқа давом этган учрашувда Маттео Карлосни 6/2, 7/6, 4/6, 2/6, 7/6 ҳисобида мағлуб этди. 

Ўйинда  Берреттини 10 та эйс ва учта брейкни амалга ошириб, икки марта қўшхатога йўл қўйди. Карлос эса 12 та эйс, тўртта брейк-поинт қайд этди ва тўққиз марта қўшхатога йўл қўйди. Бу икки теннисчининг ўзаро учрашувларида ҳисоб тенглашди - 1:1.

Эътиборлиси, баҳснинг бешинчи сети бошида италиялик теннисчи оёғидан жароҳат олди ва тиббий танаффусга мурожаат қилди. Шунга қарамай, Берреттини ўзига келиб олди ва якунда ғалаба қозонди.

Маттео ўзининг олтинчи беш сетлик ўйинини ўтказди ва бешинчи ғалабани қўлга киритди. Шунингдек, у беш сетда Алькаразни мағлуб этишга муваффақ бўлган биринчи теннисчига айланди. Бунгача испаниялик спортчи учта шундай учрашувда ғалаба қозонган эди.

Берреттини  Australian Open турнирининг тўртинчи даврасида бошқа бир испаниялик теннисчи Пабло Карреньо-Бустага қарши кортга чиқади.