Australian Open. Соболенко - Cвитолина учрашувида илк финалчи аниқланди

Аёллар ўртасидаги мусобақада илк финалчи маълум бўлди. Дунёнинг биринчи ракеткаси ортиқча қийинчиликсиз финал чиптасини қўлга киритди. Беларуслик теннис маликаси 1/2 финалда WTA рейтингида 12-ўринни эгаллаб турган украиналик Элина Свитолинани мағлубиятга учратди - 6/2, 6/3.

Теннисчиларнинг ўзаро учрашувларида Элина фақат бир маротаба зафар қучган. Қолган 6 та баҳсда Аринанинг қўли баланд келган. Етмиш етти дақиқа давом этган учрашувда Соболенко 1 та қўшхатога йўл қўйиб, 4 та брейкдан унумли фойдаланди, эйс зарбасини эса ижро эта олмади. Свитолина эса 2 та эйс, 1 та брейк қайд этиб, 3 та қўшхатога йўл қўйди. 

Элина Свитолина "Катта Дубулға" турнирларидаги охирги 4 та 1/2 финал учрашувларида 3 маротаба мағлуб бўлган. Соболенко эса фаолиятида тўртинчи бор Австралия Очиқ чемпионати финалида ўйнайди. Унинг Australian Open — 2026 бош соврини учун кечадиган финал учрашувидаги рақибаси Жессика Пегула (АҚШ) — Елена Рибакина (Қозоғистон) қарама-қаршилигида аниқланади.