Аёллар терма жамоамиз Билли Жин Кинг кубогидаги иштирокини ўтган йилги натижасини яхшилаган ҳолда якунлади

Терма жамоамиз гуруҳ босқичидан муваффақиятли чиқиб, Asia/Oceania Group I йўлланмаси учун плей-офф баҳсларида иштирок этди.

Ярим финалда Ўзбекистон терма жамоаси Филиппинга қарши кортга чиқди. Биринчи яккалик учрашувида Нигина Алимова Тенниэлле Мадисга 4:6, 5:7 ҳисобида имкониятни бой берди. Иккинчи яккалик баҳсида эса Севил Йўлдашева Шаира Риверани 6:3, 7:5 ҳисобида мағлуб этиб, умумий ҳисобни тенглаштирди.

Ҳал қилувчи жуфтлик учрашувида Нигина Алимова ва Севил Йўлдашева Алекса Жой Миллиам ҳамда Шаира Риверага қарши баҳс олиб боришди. Муросасиз кечган учрашув 6:4, 3:6, 6:10 ҳисобида якунланди ва Group I йўлланмаси супер тай-брейкда ҳал бўлди.

Натижада Ўзбекистон терма жамоаси келаси мавсум ҳам Asia/Oceania Group II мусобақасида иштирок этадиган бўлди.

Шунга қарамай, жамоамиз ўтган йилги натижасини сезиларли даражада яхшилади. Агар 2025 йилда Ўзбекистон 8-ўринни эгаллаган бўлса, бу йил гуруҳ босқичидан муваффақиятли чиқиб, турнирнинг энг кучли тўрт жамоаси қаторидан жой олди ҳамда Asia/Oceania Group I йўлланмаси учун охиригача кураш олиб бориб, ҳал қилувчи жуфтлик учрашувидаги супер тай-брейкда имкониятни бой берди.