Баҳодир Бакиев: "Осиё чемпионатида фақат ва фақат ғалаба учун жанг қиламиз"

Ўзбекистон терма жамоаси вакиллари ушбу мусобақага ҳар қачонгидан ҳам жиддий ҳозирлик кўришмоқда. 

Ўзбекистон самбо ассоциацияси матбуот хизмати ушбу мусобақа олдидан терма жамоамиз аъзоларининг фикрларини тақдим этади. Бугунги меҳмонимиз жанговар самбо бўйича терма жамоамиз аъзоси Баҳодир Бакиев бўлди:

"Осиё чемпионатида бор кучимизни бериб жанг қиламиз. Тайёргарлик яхши ўтмоқда. Айни пайтда Шаҳрисабзда машғулотлар олиб бормоқдаман. Барчаси режа асосида кечмоқда. Мусобақани сабрсизлик билан кутяпмиз. 

Рақиблар ким бўлишининг аҳамияти йўқ. Мусобақага қитъамизнинг етакчи самбочилари ташриф буюришади. Нима бўлган тақдирда ҳам Осиё чемпионатида фақат ва фақат ғалаба учун жанг қиламиз. Бизни қўллаб-қувватлаётган барчага миннатдорчилик билдираман. Худо хоҳласа яқинлашиб келаётган Осиё биринчилигида билдирилган ишончни оқлаймиз", - деди Баҳодир Бакиев.

Ўзбекистон самбо ассоциацияси матбуот хизмати