Баҳромжон Машраповнинг навбатдаги рақиби ва жанг санаси маълум

Яримўрта вазнда ўзбекистонлик аралаш яккакураш устаси Баҳромжон Машрапов (6-2) навбатдаги жангини 17 февраль куни Индианаполис (АҚШ)да ташкил этилаётган LFA 153 мусобақаси доирасида мезбон юрт вакили — Логан Урбанга (6-1) қарши ўтказади. Ушбу турнир UFC Fight Pass томонидан трансляция қилинади.

Логан Урбан фаолияти давомида UFC'га йўлланма берувчи Дана Уайт сериясида ҳам жанг қилган. Лекин унинг жанг натижаси бекор қилинган.

Маълумот учун, Баҳромжон Машрапов сўнгги бор 2022 йилнинг 19 август куни Алабама (АҚШ)да ташкил этилган B2 FC 273 мусобақаси доирасида америкалик Трестон Вайнсга (5-2) қарши жанг қилиб, нокаут эвазига ғалаба қозонганди.

Қизиғи, Логан Урбан ҳам охирги жангини айнан 19 августда ўтказган, фақат бошқа лигада. Райан Чарлебойс (3-2)га қарши октагонга чиққан Урбан ўша жангда ҳакамлар қарори билан ғолиб бўлган эди.