"Барселона" сўнгги дақиқаларда ғалабани илиб кетди

Мадриддаги “Кампо де Вальекас” стадионида кечган баҳс Вальверде жамоаси учун яхши бошланди. 11-дақиқада чап қанотдан Альба узатиб берган тўпни Луис Суарес дарвозага йўллаб ҳисобни очди-0:1. Бўлим охирларига келиб мезбонлар мувозанатни тиклашди. Хосе Анхел Посо жарима майдончаси ташқарисидан узоқ бурчакка айланма зарба йўллади. Тер Штегени ҳар қанча уринмасин, тўп дарвоза устунига тегиб, тўрга йўл олди-1:1.

Иккинчи бўлимнинг 12-дақиқасида майдон эгалари ҳисобда олинга чиқиб олишди. Захирадан майдонга тушган Альваро Гарсия каталонияликлар посбонини ожиз қолдирди-2:1. Ўйин шу ҳисобда якунига ётаётган бир пайтда Ла Лига пешқадами ирода кучини намойиш этди. Дастлаб захирадан майдонга тушган Усмон Дембеле Пике узатиб берган тўпни кучли зарбаси билан пастки бурчакка жойлаб қўйган бўлса, сўнгги дақиқаларда Серхи Робертонинг узатмасини Луис Суарес ажойиб “подкат” ишлатиб, дарвозага йўналтирди -2:3.

Ушбу ғалабадан кейин “Барселона” очколари сонини 24 тага етказиб, Ла Лига турнир жадвалида пешқадамликни давом эттираётган бўлса, “Райо Вальекано”6 очко билан 19-поғонада бормоқда.

Райо Вальекано – Барселона 2:3 (1:1, 1:2)

Голлар:0:1 – 11 Суарес, 1:1 – 35 Посо, 2:1 – 57 Гарсия, 2:2 – 87 Дембеле, 2:3 – 90 Суарес.

РайоВальекано – Гарсия, Адвинкула, Гальвес (Веласкес, 71), Амат, Морено, Комесанья, Эмбарба, Трехо (Гарсия, 57), Имбула, Посо, де Томас (Алегрия, 65).

Барселона –  тер Стеген, Серджи Роберто, Пике, Лангле, Альба, Ракитич, Бускетс, Артур (Видаль, 67), Рафинья (Дембеле, 52), Суарес, Коутиньо (Мунир, 67).

Огоҳлантириш: Амат (6), Лангле (17), де Томас (49), Альба (70), Гарсия (89), Веласкес (90).