"Бавария" 14 ёшли Ямални сотиб олмоқчи бўлган, аммо трансфер суммасини тўлашга журъат этмаган

Бу ҳақда Bild газетасининг футбол бўлими бошлиғи Кристиан Фалк ўзининг "Transfer-Insider" номли янги китобида маълум қилган.

2022 йил февраль ойида "Бавария" раҳбарлари - спорт директори Ҳасан Салиҳамиджич ва техник директор Марко Неппе Ямалнинг ўша пайтдаги агенти Иван де ла Пеня билан учрашиш учун Мадридга ташриф буюришган. Томонлар де ла Пеня ваколатидаги Гавининг Мюнхен клубига ўтиши имкониятини муҳокама қилмоқчи бўлишган.

Кутилмаганда, суҳбат давомида "Бавария" вакиллари эътиборни "Барса"нинг асосий жамоаси билан машқ қилаётган 14 ёшли Ламин Ямалга қаратишган. Фалкнинг айтишича, мюнхенликлар Ламиннинг ўйин лавҳаларидан шунчалик таъсирланишибганки, клуб раҳбарияти футболчининг оиласи билан танишиш ва келажакдаги трансфер учун замин яратишни истаган.

Бир неча ойдан сўнг де ла Пеня Салиҳамиджичга Ямалнинг манфаатларини энди Жорже Мендеш ҳимоя қилишини маълум қилган. Португалиялик агент "Бавария" директорига футболчининг трансфери тахминан 5 миллион еврога амалга ошиши мумкинлигини айтган. "Бавария"да профессионал футболда ҳали бир дақиқа ҳам ўйнамаган футболчига бундай катта маблағ сарфлашни хавфли деб баҳолашган ва масалани 2023 йил ёзига қолдиришган.

Бироқ, 2023 йил апрель ойида Ямал 15 ёшида "Барса" сафида дебют қилди ва октябрь ойида "Барса" билан уч йиллик шартнома имзолади.