Белграддаги UFC турнири оғир вазн тоифасидаги жангдан маҳрум бўлди

Ушбу турнир кардидан ўрин олган Жонни Уокернинг оғир вазн тоифасидаги дебюти номаълум муддатга қолдирилди. Ташкилот матчмейкерлари жангдан чиқиб кетган Анте Делия ўрнига муносиб рақиб топа олишмади, шу сабабли бразилиялик аралаш яккакураш устаси жароҳат олган хорватиялик рақиби ортидан Белграддаги UFC Fight Night 283 турнирини тарк этди.

Бу ҳақда спорт шарҳловчиси Гильерме Круз хабар берди. Ўтган йилнинг август ойида Жонни Уокер икки карра нокаут билан якунланган мағлубиятлар сериясига чек қўйиб, хитойлик Минян Чжанни иккинчи раундда техник нокаут эвазига мағлуб этганди. 

Бироқ жорий йилнинг апрель ойида у яна мағлубиятга учради: мазмунсиз кечган жангда ҳакамларнинг айри қарори билан Доминик Рейесга имкониятни бой берди. Сербияда 1 август куни бўлиб ўтадиган турнирдаги жанг 34 ёшли бразилиялик учун UFC`нинг ярим оғир вазн тоифасида ўтказилган 16 та жангдан сўнг оғир вазндаги илк дебюти бўлиши керак эди.