Белинда Бенчич Топ-10'даги рақибини мағлуб этиб, Чарльстон турнири бош совринини қўлга киритди

Чемпионлик учун жаҳоннинг 21-ракеткаси швейцариялик Белинда Бенчич WТА рейтингида ўнинчи ўринни эгаллаб турган тунислик Онж Жаберга қарши кортга чиқди. Учрашувда Бенчич рақиби устидан 6/1, 5/7, 6/4 ҳисобида ғалаба қозонди ва турнир чемпионига айланди.

Ушбу баҳс 2 соату 35 дақиқа давом этди. Ўйин давомида 25 ёшли Бенчич битта эйс зарбасини амалга оширди, тўпни ўйинга киритишда беш марта хатога йўл қўйди ва еттита брейк-пойнтдан унумли фойдаланди. 27 ёшли Жабер эса тўртта эйс, бешта брейк қайд этиб, тўртта қўш хатога йўл қўйди. Спортчиларнинг ўзаро учрашувларида ҳисоб швейцариялик теннисчи фойдасига 2:0 кўринишига келди.

Чарльстондаги ғалаба учун Бенчич 470 рейтинг очкоси ва 158 800 доллар мукофот пулига эга бўлди.