Bellator 279: Киборг камарини ҳимоя қилди, Стотс ва Микс Гран-при 1/2 финалида

АҚШнинг Гавайи штати Гонолулу шаҳрида ташкил этилган Bellator 279 турнирининг марказий жанги ярим енгил вазн тоифасида амалдаги Bellator чемпиони Крис "Киборг" Жустино иштирокида бўлиб ўтди. Киборг тўртинчи чемпионлик ҳимоя жангида Арлин Бленкоуга қарши октагонга кўтарилди.

Австралиялик жангчи номдор рақибасига муносиб қаршилик кўрсатди. Жанг тўлиқ беш раунд давом этди ва якунда чемпион 49-45, 49-45, 49-45 ҳисобларида ғалаба қозонди. Биринчи раунднинг ўзида Крис Арлинни нокдаун ҳолатига тушириб қўя олди. 

Яна бир қизиқарли жангда енгил вазн тоифаси вакили Рауфьон Стотс Bellator чорак финалида Хуан Арчулетни учинчи раундда нокаутга учратди. У ярим финалга йўл олиш билан бирга дивизионнинг вақтинча чемпионлик камарини ҳам қўлга киритди. Стотснинг рақиби Леандро Иго ва Дэнни Сабателло ўртасидаги жангда аниқланади. Ушбу жанг 24 июнь куни Bellator 282 турнири доирасида бўлиб ўтади.

Патрик Микс Гран-прининг яна бир ярим финалчисига айланди. У беш раунд якунига кўра Киоджи Хоригучидан очколар ҳисобида устун келди. Микснинг ярим финалдаги рақиби Магомед Магомедов - Энрике Барзола жангидан сўнг маълум бўлади.

Шунингдек, Bellator 279 турнирида Рэнди Филда, Сумико Инаби ва Гоити Ямаучи рақибларини муддатидан аввал мағлуб этишни уддалашди.