28 мар 20:33
Янгиликлар

Дзюдо

Белодед - 18 ёшида икки карра жаҳон чемпиони бўлган дунёнинг энг ёш дзюдочиси! (Сара суратлари+18)

Украиналик 19 ёшли дзюдочи Дарья Белодед икки карра жаҳон чемпиони бўлган сайёрамизнинг энг ёш дзюдочиси ҳисобланади.

Белодед ўтган йили дзюдо ватани - Япониянинг Токио шаҳрида ўтказилган жаҳон чемпионатида иккинчи бор ўз вазнида дунёнинг энг кучли спортчиси эканини амалда исботлаганди. Финалда у япониялик Фуна Танакини вазари баҳоси эвазига мағлуб этиб, икки карра жаҳон чемпионига айланган ва шу билан билан бирга унвонини ҳимоя қилганди. Финал куни украиналик дзюдочи 18 ёшу 11 ойлик эди.

Дарья Белодед - 2000 йилнинг 10 октябрь куни Украинанинг Киев шаҳрида дунёга келган. Унинг отаси машҳур дзюдочи Геннадий Билодид, онаси эса Светлана Кузнецова. Дарья ёшлигидан отаси изидан бориб, дзюдо билан профессионал тарзда шуғуллана бошлади. Айнан ота-онаси унинг илк мураббийлари эди.

Даша 2015 йилда айтишга арзигулик илк ютуқларига эришди. Аввалига мамлакат чемпиони бўлди. Кейин эса Европа ҳамда жаҳон чемпионатининг олтин медалларини ҳам қўлга киритди.

Катталар ўртасидаги илк медалига эса 2017 йилда эга чиқди. Ўша йилнинг март ойида у Прага шаҳрида ўтган Қитъалараро очиқ кубокда шохсупанинг энг юқори поғонасига кўтарилди. 2017 йилнинг 20 апрель куни Белодед Польша пойтахти Варшава шаҳрида Европа чемпиони бўлди. -48 кг вазнда татамига чиққан Дарья финал беллашувида россиялик Ирина Долговани мағлубиятга учратди.

2018 йили ҳали 18 ёшга ҳам тўлмаган қаҳрамонимиз катталар ўртасида жаҳон чемпиони бўлди. Белодед иккинчи даврадан баҳсларга киришди ва финалга қадар Дистрий Красники (Косово), Яо Ксионг (Хитой), Галбадрахин Отгонцэцэг (Қозоғистон), Паула Парета (Аргентина)дан устун келди. Парета Рио-2016 Олимпиадаси чемпиони эди. Уч дақиқа давом этган финал учрашувида эса амалдаги жаҳон чемпиони, япониялик Фуна Танакини соф иппон баҳоси эвазига мағлуб этди ва 17 ёшида жаҳон чемпионига айланди.

Бу билан Дарья Белодед дзюдо тарихидаги ҳам эркаклар, ҳам аёллар ўртасида энг ёш жаҳон чемпиони деган мақони ўзиники қилиб олди. Ўтган йили Токиода ўтган жаҳон чемпионатида эса у чемпионлик унвонини муносиб тарзда ҳимоя қилди. Бу сафарги финалда ҳам Фуна Танакини енгишга муваффақ бўлди.