Биласизми? Бугун боксчиларимиз иккита бронзани нақд қилишлари мумкин

Улардан бевосита 4 нафари бугун медалларга эга чиқиши мумкин. Дзюдочиларимиз ҳақида маълумот берган эдик. Боксчиларимиздан эса бугун икки нафари камида бронза медалини нақд қилиши мумкин.

Боиси, улар чорак финал жангларида рингга кўтарилишади ва ярим финал чиптаси бу камида бронза медали дегани бўлади. -49 кг вазн тоифасидаги ҳамюртимиз Ҳасанбой Дўсматов қозоғистонлик азалий рақиби Биржан Жакиповга қарши жанг ўтказади. Боксчилар ўзаро уч маротаба тўқнаш келишган. Жангларнинг иккитасида Ҳасанбой зафар қучган. Жангларнинг бирида у рақибини нокаутга ҳам учратган. Бугун ҳам Дўсматовдан ана шундай ишончли ғалаба кутиб қоламиз.

Яна бир чарм қўлқоп устамиз -91 кг вазндаги Рустам Тўлаганов бугун озарбайжонлик Абдуқодир Адуллаев билан муносабатларига ойдинлик киритиб олади. Ғалаба боксчимизга камида бронза медални тақдим этади.

БОКСЧИЛАРИМИЗНИНГ БУГУНГИ ИШТИРОКИ:

Рустам Тўлаганов - (Бокс, -91 кг вазн тоифасида, чорак финал) - 21:45

Ҳасанбой Дўстматов - (Бокс, -49 кг вазн тоифасида, чорак финал) - 01:00

Фазлиддин Ғоибназаров - (Бокс, -64 кг вазн тоифасида, 1/16 финал) - 02:15

Эслатма: Тошкент вақтида берилган.