Бироздан сўнг Истомин Алмати турнирида бош соврин учун кортга чиқади

Соврин жамғармаси 50 000 АҚШ долларини ташкил қилувчи ушбу турнирда ҳамюртимиз Денис Истомин биринчи рақам остида ҳаракат қиляпти. Осиё ўйинлари ғолиби Алматида ҳам ғолибона юришини давом эттирмоқда. 

Кеча вакилимиз ўз вақтида дунёнинг 24-ракеткаси бўлган чехиялик Лукаш Росолни 1 соату 46 дақиқа давом этган мураккаб ярим финал учрашувида 3:6, 6:3, 6:4 ҳисобида мағлуб эта олганди. Бугун у бош мукофот учун кортга чиқади. 

Дениснинг финалдаги рақиби ATP рейтингида 201-ўринни эгаллаб турган Никола Милоевич бўлади. Сербиялик бу теннисчи кеча ярим финалда дунёнинг 77-ракеткаси босниялик Мирза Башични роппа-роса 2 соат давом этган баҳсда 3:6, 7:6(3), 6:3 ҳисобида мағлуб этди. 

Маълумот учун, Истомин Милоевич учрашуви Тошкент вақти билан соат 10:00да бошланади. Бу икки теннисчи шу кунгача ўзаро бир маротаба тўқнаш келишган. Икки йил аввал айнан Қозоғистондаги “Челленжер” турнирида Истомин рақибидан устун келганди. Аниқроғи, биринчи сетни 2:6 ҳисобида бой берган Милоевич иккинчи сетга чиқмаган эди.