Бироздан сўнг Истомин финал чиптаси учун кортга чиқади

Соврин жамғармаси 50 000 АҚШ долларини ташкил қилувчи ушбу турнирда ҳамюртимиз Денис Истомин биринчи рақам остида ҳаракат қиляпти. Осиё ўйинлари ғолиби Алматида ҳам ғолибона юришини давом эттирмоқда. 

У бироздан сўнг бошланадиган ярим финал учрашувида Лукаш Росолга қарши кортга чиқади. Чехиялик 33 ёшли теннисчи ўз вақтида дунёнинг 24-ракеткаси бўлган. Лукаш кеча чорак финалда германиялик Тобиас Камкени 6:1, 6:4 ҳисобида таслим этди. Денис эса турнирнинг еттинчи ракеткаси сифатида сараланган сербиялик Миомир Кецмановичдан 6:3, 6:4 ҳисобида устун келди. 

Таққослаш учун, Денис Истомин дунё рейтингида 103, Лукаш Росол эса 177-ўринни эгаллаб турибди. Теннисчилар шу кунгача ўзаро турнирларда беш маротаба тўқнаш келишган. Учрашувларнинг тўрттасида Лукаш, фақат биттасида Денис зафар қучган.