12 янв 14:01
Янгиликлар

Қишки спорт турлари

Бироздан сўнг спортчимиз қишки Олимпия ўйинларида стартга чиқади

9 январь куни Швейцариянинг Лозанна шаҳрида ёшлар ўртасида қишки Олимпия ўйинларига старт берилган эди.

Олдинроқ хабар берганимиздек, бугун ушбу Олимпия ўйинларида юртимиз шарафини ҳимоя қилаётган ягона спортчимиз Валерия Ковалёва мусобақалардаги иштирокини бошлайди.

Қишки спорт турларидан тоғ чанғисининг гигант слалом йўналишида ғолиблик учун кураш бошлайдиган ҳамюртимизнинг чиқишлари Тошкент вақти билан соат 14:30 да бошланиши кутилмоқда.

Ушбу мусобақалар Лозанна шаҳридан тахминан 80 км узоқликда жойлашган Дебрелис тоғли ўрмонида қишки спорт турларига ихтисослашган чанғи йўлаклари майдонида бўлиб ўтади.

Айни пайтда спортчимиз Валерия Ковалёва ўз мураббийи Андрей Воронов билан кўтаринки кайфиятда мусобақадаги дастлабки иштирокига жиддий ҳозирлик кўрмоқда. Биз бугунги мусобақалардан кейин ҳам Валерияда аъло кайфият сақланиб қолишига ишонамиз.