Боксчиларимиз ЖЧ олдидан Екатеринбургдаги ўқув-машғулот йиғинларида иштирок этишмоқда + ФОТО

Ушбу нуфузли мусобақада ўзбекистонлик чарм қўлқоп усталари ҳам совринли ўринлар учун кураш олиб боришади. Юртдошларимиз мусобақада совринли ўринлар учун энг асосий даъвогарлардан бири ҳисобланишади. 

Ўзбекистон бокс федерацияси мусобақада муносиб иштирок этиш мақсадида, жаҳон чемпионатига тайёргарликнинг энг сўнгги босқичини айнан ЖЧ ўтказиладиган Екатеринбург шаҳрида ташкил этди. Бу ғоя шубҳасиз терма жамоамизнинг мослашув жараёни учун ижобий таъсир қилади. 

Ўқув-машғулот йиғинларида нафақат жаҳон чемпионатида иштирок этувчи боксчиларимиз, балки терма жамоамиздаги 2-3 рақамли чарм қўлқоп усталари ҳам қатнашишмоқда. Жисмоний ва тактик тайёргарлик, спарринг жангларини ташкил этишда ушбу боксчиларимизнинг ҳам ўзига яраша ўрни бор. 

Қайд этиш лозимки, ҳозирда Марат Қурбонов бошчилигидаги терма жамоа мураббийларидан ташқари боксчиларимизнинг шахсий мураббийлари ҳам Екатеринбургда бўлиб туришибди. Бу ҳам мусобақа давомида боксчиларимизнинг фақат ва фақат фойдаси учун хизмат қилиши шубҳасиз. 

Ўзбекистон бокс федерацияси матбуот хизмати