Боксчиларимизнинг Янгиободдаги йиғини якунланди

5-18 июнь кунлари Тошкент вилоятининг Янгиобод ўқув-машғулот базасидаги ўтказилган йиғинда 31-ёзги олимпия ўйинлари йўлланмасини  қўлга киритган 10 нафар боксчимиз иштирок этди. Икки ҳафталик машғулотларда одатдагидек умумжисмоний тайёргарликка эътибор  қаратилди.

Бугундан Марат Қурбонов (шунингдек, мураббийлар Равшан Хўжаев, Тўлқин Қиличев, Истам Кабинов) бошчилигидаги Ҳасанбой Дўсматов(49 кг), Шаҳобиддин Зоиров (52 кг), Муроджон Аҳмадалиев (56 кг), Хуршид  Тожибоев (60 кг), Фазлиддин Ғоипназаров (64 кг), Шаҳрам Ғиёсов (69 кг), Бектемир Мелиқўзиев (75 кг), Элшод Расулов (81 кг), Рустам Тўлаганов (91 кг), Баҳодир Жалолов (+ 91 кг) дан  иборат терма жамоамиз Чимён дам олиш базасида жам  бўлишган.

Тоғ ён бағрида боксчиларимиз енгил машғулот билан бирга асосан тикланиш машқларига эътибор қаратадилар. Бир ҳафта давомида жисмоний зўриқишлардан ҳоли бўлган олимпиячиларимиз 27 июнь куни ўз уйларига йўл  олишади.

Рио-2016 ўйинлари олдидан чарм қўлқоп усталармизнинг иккинчи босқич йиғини 1 июль куни яна Янгиобод базасида бошланади. Икки ҳафталик  йиғинда асосий эътибор спаринг жанглари, куч, тезлик каби сифатларни ривожлантиришга қаратилиши кутилмоқда. Июль ойининг учинчи ҳафтасида эса терма жамоамизнинг сўнгги йиғини олимпия манзили Рио-де-Жанейро шаҳрига кўчиши режалаштирилган.

Улуғбек Ҳакимжонов тайёрлади