Болалар спорти. Мақсад ва марра сари интилаётган қамашилик ёшлар

Бундай юксак эътибордан унумли фойдаланган спортчи-ўқувчилар бор маҳоратларини ишга солиб, мақсадлари сари дадил қадам ташлашмоқда. Қашқадарё вилоят спорт бошқармаси тасарруфидаги Қамаши туман 1-сонли болалар ва ўсмирлар спорт мактабида ҳам спорт машғулотларига қатнаётган болаларнинг юз-кўзларида яратилган имкониятлардан, бугунидан шодумонликни англаб олиш қийин эмас.

Тажрибали мутахассис Ғанишер Эргашев раҳбарлик қилаётган мазкур спорт мактабида айни пайтда 1000 нафарга яқин ўғил-қизлар спортнинг футбол, бокс, волейбол, қўл тўпи, стол тенниси, таэквондо WT, дзюдо, оғир атлетика, кураш, Ўзбек жанг санъати, пара футбол, пара пауэрлифтинг, пара енгил атлетика турлари бўйича 24 нафар малакали мураббийлар қўл остида мунтазам машғулотларга киришган.   

Спорт мактаби тарбияланувчилари орасида ўтказилаётган турли мусобақаларда ғолиб ва совриндор бўлиб, эътирофга сазовор бўлаётганлари талайгина. Хусусан, оғир атлетика, енгил атлетика, Ўзбек жанг санъати, стол тенниси, гандбол, футбол, таэквондо сингари спорт турлари билан шуғулланаётган ёшлар вилоят ва республика миқёсидаги беллашувларда совринли ўринлар билан қайтишмоқда.

Айниқса, енгил атлетика бўйича малакали тренер Шахноза Номозова шогирдларининг қўлга киритаётган натижалари эътирофга сазовор дейиш мумкин. Мисол учун, 2024 йилда Нукус шаҳрида ўтказилган Ўзбекистон чемпионатида спорт мактаби енгил атлеткачилари ҳам иштирок этиб, бир нечта совринли ўринларга эгалик қилишган.

Жорий йилги Республика чемпионатларида Бехруз Худойназаров, Жонибек Самадов, Муҳаммадали Жобборов, Давлатбек Самадов, Озодбек Абдихомидов каби спортчилар енгил атлетиканинг турли йўналишларидан олтин, кумуш ва бронза медалларига сазовор бўлишиб, спорт мактабининг фахрига айланишди.

- Спортнинг енгил атлетика турини аҳоли орасида, жумладан, ёшлар орасида оммавийлигини таъминлаш, иқтидорли ўғил-қизларни кашф этиб, катта спорт сари етаклаш бош вазифаларимиздан саналади, - дейди Қамаши туман 1-сонли спорт мактабининг енгил атлетика бўйича мураббий Шахноза Номозова. - Яратилган бундай кенг имкониятлардан оқилона фойдаланган ҳолда, мавжуд спорт турларидан истеъдодли болалар қобилиятини шакллантириб, терма жамоалар таркибига муносиб номзодлар тайёрлаш қолаверса, 2026 йилда совринли натижаларимизни янада кўпайтиришни  мақсад қилганмиз.

Демак, жорий йилги ютуқлар сони кейинги йилда янаям кўпяди боиси, шу масканда меҳнат қилаётган устозлар ва спортга ошно болалар учун бу каби эътибор-эътироф уларни мақсад ва марра сари етаклаверади. 

Илҳом РАҲМОНОВ тайёрлади