Ботир Аҳмедов ҳакамлар қароридан норози

Оқшом доирасида суперенгил вазн тоифасида (63,5 кг) юртимиз шарафини ҳимоя қилиб келаётган 32 ёшли чарм қўлқоп устамиз Ботир Аҳмедов (9-3) америкалик 29 ёшли Кеннет Симс Жуниор (20-2-1)га очколар ҳисобига кўра ютқазиб (112-116, 113-115, 114-114) қўйди. 

Ушбу жанг суперенгил вазн тоифасида WBA чемпионлик камарига мажбурий даъвогар (Eliminator) номини аниқлаб берди. Симс Жуниор кейинги жангини чемпионлик камари учун ўтказади. Камар йўлидаги учинчи уринишда ҳам мағлубиятга учраган Аҳмедов эса баҳсли ғалабани Кеннетга тақдим этган ҳакамлар қароридан норози эканини билдирди. 

"Албатта, мен бу жангни кўриб чиқишим керак. Ўйлашимча, бугунги жангда ғалаба қозондим. Мен ўзим мағлуб деб ҳисобламайман. Шундай хулоса келяптики, рақибларим 12 раундни бир амаллаб тўлиқ ўтказиб олишса, ғалаба қозонишади. Ҳеч бир 12 раунлик жангда менга ҳали ғалабани беришмади. Бу мен учун жуда оғир. Мен машғулотларга қанча куч сарфладим. Жаҳон чемпиони бўлишдек олий мақсадим ниҳоят учинчи уринишда амалга ошади деб ўйлагандим. Лекин ўхшамаяпти. Балки мухлислар объектив фикр билдиришар. Нима деб ўйлайсиз, бу жангда ким ғалаба қозонди?", - деди Аҳмедов.