Бойназаров Тошкентга кела олмаслиги сабабини тушунтирди

Марказий жанглардан бири бўлиши кутилган Анвар Бойназаров иштирокидаги баҳс ўтказилмайди. Бунга Бангкокдан Тошкентга уча олмаган самолёт сабаб бўлди.

“Афсуски, кутилмаган ҳолат рўй берди. 2-3 кундан бери Бангкок шаҳридан Тошкентга уча олмаяпмиз. Тошкентга учиши керак бўлган ҳаво лайнерида носозлик юзага келган. Носозликни бартараф этишга бўлган барча уринишлар бесамар кетди.

Мендан ташқари, Ўзбекистон Республикасида хизмат кўрсатган артистлар ҳам бор эди. Хатто уларга ҳам бошқа шаҳардан учадиган рейсга чипталар қилиб берилмади. Бугун Малайзия орқали учишим мумкин эди. Лекин мен профессионал спортчиман. Таваккал қила олмайман.

Бангкокдан Тошкентга учадиган навбатдаги рейс сешанба куни бўлади. Бузилган самолёт ўрнига Тошкентдан бошқа ҳаво лайнери келади дейишганди. Бу ҳам амалга ошмади. “Asian Fight” турнирида иштирок этмайман ва бунинг учун мухлислар ва ташкилотчилардан узр сўрайман”, - деди Бойназаров.