Брендон Морено Дейвесоннинг ирқчилик ҳақидаги айбловларига жавоб қайтарди

Брендон Морено мексикалик билан тўртинчи жангдан бош тортганини рақиб жамоадаги ирқчиликнинг намоён бўлиши билан изоҳлаган амалдаги дивизион чемпиони Дейвесон Фигередога жавоб қайтарди.

«Бу шунчаки аҳмоқлик», деди Морено ESPN Deportes'га. «Менинг дўстим матбуот анжуманини жонли эфирда узатиб, телефонидаги фильтрлар билан ўйнаб юрган эди. Афсуски, бизда тўлиқ видео йўқ – у сақламаган. У ҳаммага - Дана Уайтга, жамоадошларимга ва ҳатто менга фильтр қўйди. Фигередо маймун ниқоби билан пайдо бўлганида, кимдир скриншот олди ва Марсело Рохони ирқчи деб атай бошлади. Биз ҳаммамиз Марселони биламиз – у ирқчи деб аталган охирги одам».

Моренонинг таъкидлашича бразилияликнинг сўзларига қарамай, UFC унга улар ўртасидаги тўртинчи жангни ташкил этиш ҳозирда устувор вазифа эканлигини ва бошқа вариантлар кўриб чиқилмаганини тасдиқлади.

«Мен UFC билан, ташкилотдаги асосий йигитлар билан гаплашдим - улар менга тўртинчи жанг тайинланганини  ва бу ҳақда ташвишланишга ҳожат йўқлигини айтишди. Менинг режам яна чемпионлик учун курашиш ва Дейвесон мендан узоқлашишга ҳаракат қилмоқда. Мен ёлғон гапирмайман – UFC Морено ва Фигередони тўртинчи жангда кўрмоқчи. Мен аллақачон «ҳа» дедим, лекин бошқа томоннинг жавобини эшитмадим».