Бугун Ҳумоюн Швециядаги турнирда ўйнайди, Файзиев ва Фомин ютқазишга улгурди

Ушбу мусобақада ўзбекистонлик теннисчилар ҳам иштирок этишмоқда. 

Кеча асосий тўр баҳсларига старт берилди. Мусобақанинг асосий босқич баҳсларида қатнашаётган Санжар Файзиев илк босқичда франциялик Валентин Ройерга 0:6, 6:7 ҳисобида ютқазди.

Сергей Фомин эса АҚШ шарафини ҳимоя қилаётган Васил Кирковга 3:6, 2:6 ҳисобида имкониятни бой берди. 

Бугун турнирда тўртинчи рақам остида сараланган Ҳумоюн Султонов саралаш босқичидан асосий даврага қўшилган Владимир Ивановга қарши кортга чиқади. Ўйин Тошкент вақти билан соат 16:00дан сўнг бошланиши белгилаб қўйилган. 

Ҳумоюн Султонов мусобақанинг жуфтлик баҳсларида япониялик Юта Шимицу билан тандем сифатида қатнашмоқда. Улар кеча илк босқичда финляндиялик теннисчилардан ташкил топган Салминен/Васа тандемини 4:6, 6:4, 10:7 ҳисобида мағлубиятга учратишди. Ёдингизда бўлса, Ҳумоюн ва унинг япониялик дўсти ўтган ҳафта Швециядаги бошқа бир турнирнинг жуфтлик баҳсларида ғолибликка эришганди. 

Бугун шунингдек, Санжар Файзиев ва Сергей Фомин жуфтлик беллашувларида Марлус Ругзас (Швеция) ва Ливл Саатела (Финляндия) тандемига қарши кортга чиқади.