“Бугун илк маротаба биринчи ўринни қўлга киритдим, шунинг учун йиғлаяпман". Қиличбозлик мусобақасида кучлилар сараланди

Пойтахтимиздаги Қиличбозлик федерациясига тегишли "Пахтакор" спорт мажмуаси мезбонлигидаги мусобақада Тошкент шаҳар, Қорақалпоғистон Республикаси ва вилоятлардан йиғилган 80 га яқин ёшлар шпага ва рапира йўналишларида ғолиблик учун баҳслашдилар. Таъкидлаш жоизки, мусобақа Ўзбекистон Миллий Олимпия Қўмитаси ва Қиличбозлик федерацияси ҳамкорлигида ташкил этилди.

Кеча бўлиб ўтган шпага бўйича баҳсларда Мирзоулуғбек Муминов 1-ўринни қўлга киритди. Финалдан сўнг, Муминов ўз таассуротлари билан ўртоқлашди. 

“Қиличбозлик спорт тури билан 5 йилдан буён шуғулланаман. Шу вақтгача Ўзбекистон чемпионатларида бир неча бор ғолиб бўлганман. Сингапурда бўлиб ўтган Очиқ турнирда 3-ўринни қўлга киритганман. Мана шу турнирдаги мен учун энг қийин ўтган баҳс Шохруҳ Сиддиқовга қарши кечган  финал беллашуви бўлди. Сабаби жароҳат билан ҳаракат қилдим. Лекин шукурки, 1-ўринни қўлга киритдим. Энг катта мақсадим Парижда бўлиб ўтадиган Олимпиада ўйинларида иштирок этиш”, - деди Муминов.

Қизлар ўртасида кечган баҳсда қорақалпоғистонлик Дилназ Мурзатаева ғалаба қозонди

“Финал баҳси жуда ҳам қийин бўлди, ютқазиб қўяман деб қўрққандим. Сабаби рақибам мени тақиб қилиб келди. Очколар орасидаги фарқ ҳатто 1 очкогача қисқариб кетди. Аммо мураббийимнинг керакли вақтда берган кўрсатмалари эвазига ўзимга келиб олдим ва ғалаба қозондим. Бугун илк маротаба биринчи ўринни қўлга киритдим, шунинг учун йиғлаяпман. Мураббийим Қорақалпоғистонда, бу ерга кела олмаганлиги сабабли  телефон орқали мулоқот қилиб турдик баҳс давомида. 13 ёшимдан бу спорт тури билан шуғулланаман. Париж Олимпиадасига лицензияни қўлга киритиш энг катта мақсадим”, - деди Дилназ Мурзатаева.

Дастлабки куни рапира, 22 июнь куни эса шпага йўналишида кучлилар сараланди. 

Ғолиб ва совриндорлар рўйхати:

Рапира :

Ўғил болалар:

1. Анвархон Солихўжаев

2. Иляс Молина

3. Радмир Семенеев

3. Муҳаммадюсуф Асранов

Қизлар:

1. Маржона Усмонова

2. Ойдиной Наимшерова

3. Мафтуна  Давронова

3. Екатерина Таджирова

Шпага:

Ўғил болалар

1.Мирзоулуғбек Муминов

2. Муҳаммадюсуф Сидиқов

3. Исмоил Олимжонов

3. Зафар Сидиқов

Қизлар

1. Дилназ Мурзатаева

2. Севара Раҳимова

3. Азиза Ҳамидова

3. Рада Касимова

Хуршида Абдикулова ва Сарвиноз Рахмонқулова тайёрлади