Бугун Истомин турнирнинг иккинчи ракеткасига қарши кортга чиқади

Хабар берганимиздек, ушбу турнирда ҳамюртимиз Денис Истомин ҳам муваффақиятли одимлаяпти. Мамлакатимизнинг биринчи ракеткаси бугун иккинчи даврада турнирнинг иккинчи сараланган теннисчиси Филипп Кольшрайберга қарши ўйин ўтказади.

Таққослаш учун, Истомин дунё рейтингида 95, германиялик теннисчи эса 29-ўринни эгаллаб турибди. Теннисчилар шу кунгача ўзаро 5 маротаба тўқнаш келишган. Учта учрашувда Денис, қолган 2та баҳсда Филиппнинг қўли баланд келган. 

Сўнгги бор улар шу йилнинг 12 июнь куни Штутгартдаги турнирда учрашишган эди. Ўшанда Истомин кучли рақибини икки сетда мағлуб этишнинг уддасидан чиққанди. Истомин -Кольшрайбер баҳси бугун бизнинг вақт билан соат 16:00да бошланиши белгилаб қўйилган. 

Эслатиб ўтамиз, ҳамюртимиз Австрия турнирини саралаш босқичидан бошлаган ва икки рақибини мағлуб этган ҳолда асосий тўрга йўл олганди. Денис мусобақанинг асосий давра илк ўйинида эса аргентиналик Федерико Дельбонисдан 7:6, 6:2 ҳисобида учтун келган эди.