Бугун Олимпиаданинг бешинчи куни 20та медаллар жамланмаси ўйналади

Бугун тўрт йилликнинг энг нуфузли мусобақасида жами 20та медаллар жамланмаси ўйналади. Спортчилар бугунги дастурдан ўрин олган академик эшкак эшиш, велоспорт, слаломда эшкак эшиш, ўқ отиш, спорт гимнастикаси, дзюдо, сувга сакраш, қиличбозлик, оғир атлетика, стол тенниси турлари бўйича медаллар учун баҳсларга киришишади.

Хабар берганимиздек, бугун 6 нафар ҳамюртимиз бокс, дзюдо ҳамда академик эшкак эшиш спорт турларида ўз имкониятларини синовдан ўтказишади. Дзюдо мусобақасида татамига чиқадиган Шерали Жўраев (-90 кг) ва Гулноза Матниёзова (-70 кг)лардан бугун медал кутиб қоламиз.

Агар бугун боксчиларимиз Ҳасанбой Дўсматов (-49 кг) ва Рустам Тўлаганов (-90 кг) ўз рақибларини мағлуб этишса, улар ҳам камида Олимпиаданинг бронза медалларини нақд қилишади. Академик эшкак эшувчимиз Шаҳбоз Холмурзаев эса бугун 13-24 - ўринлар учун стартга чиқади. У 2000 метр масофада ўтказиладиган баҳсларда иштирок этади.