Бугун теннисдаги янги юлдуз - Карлос Алькараз 19 ёшга тўлди

Алькараз 2003 йилнинг 5 майида Испаниянинг Эл-Пальмар шаҳрида таваллуд топган. Унинг учта акаси бор: Алваро, Серхио ва Хайме. У теннисдаги илк қадамларини тўрт ёшида отасининг теннис мактабида қўйган. Алькараз теннисдаги профессионал фаолиятини 2018 йилда бошлаган. 

Карлос ўз фаолияти давомида тўртта АТР турнири ғолиби бўлган, шулардан учтасини бу йил қўлга киритди. Унинг «Катта Дубулға» турнирларидаги энг яхши натижаси 2021 йилги US Open чорак финали бўлган. Шунингдек, испаниялик теннисчи фаолияти давомида 4 338 906 доллар ишлаб топишга улгурди. 

Унинг учун АТР рейтингидаги энг юқори ўрин шу йилнинг апрель ойида тўққизинчи поғонага кўтарилганида бўлди.

Спортчининг ёшлигидаги кумири ҳамюрти Рафаэль Надаль эди. Карлос Алькаразга мухлис ва мутахассислар Надальнинг издоши дея қарайди. Бу бежиз эмас. Сабаби Карлос Надаль қайд этаётган натижаларга бирин-кетин эришмоқда. Икки теннисчининг ҳатто мухлислик қиладиган футбол жамоаси ҳам бир - "Реал Мадрид".

Кеча "Сантяго Бернабеу" да бўлиб ўтган ўйинга Карлос ҳам Рафа ҳам ташриф буюриб, севимли жамоасини стадиондан қўллаб-қувватлади.

Бўш вақтида Карлос гольф ва футбол ўйнашни яхши кўради. 

Бугун 19 ёшга қадам қўйган теннисчидан бир маромдаги теннис мухлисларини хушнуд этадиган ажойиб ўйинлар кутиб қоламиз.