Бутунжаҳон сузиш федерацияси президенти Ўзбекистонга келди

Мартабали меҳмонни Ўзбекистон Республикаси Спорт вазири Адҳам Икрамов, ООК вице-президенти, МОҚ раисининг биринчи ўринбосари Отабек Умаров ва Қўмита Бош котиби Ойбек Касимов қарши олишди. 

Жаноб Мусаллам сафари давомида Самарқанд ва Тошкент шаҳарларида бўлиб, қадимий жойларни зиёрат қилиш билан бирга мамлакатимизда сув спорти турларини ривожлантириш масалаларини муҳокама қилди.

Мамлакат сузиш федерацияси раиси Қудраттилла Рафиков билан ўтган йиғилишда бир қатор истиқболли лойиҳалар кўриб чиқилди. 

Қудратилла Мирсагатович янги шакллантирилган федерация жамоаси ўз олдига улкан мақсадлар қўйгани, хусусан, сув спорти турларини мамлакатимиз бўйлаб янада оммалаштириш, ҳудудлардаги моддий-техник базани кучайтириш устувор режалардан экани ҳақида гапириб ўтди. Қолаверса, Қ.Рафиков Республикамизнинг кўплаб вилоятларида замонавий, халқаро стандартлар асосида янги сузиш ҳавзалари қурилгани ҳақида маълумот берди.

Ўз ўрнида, расмийлар давлатимиз раҳбарининг қўллаб-қувватлаши билан сув спорти турларининг ривожи янги босқичга чиқишини билдиришди. Жаноб Мусаллам юртимизда спортга бўлган эътибор йил сайин ортиб бораётганидан хабардор экани, бу жиҳат ҳар қандай халқаро ташкилот раҳбарларини ҳамкорликда ишлашга ундашини алоҳида таъкидлади.

Самимий руҳда ўтган суҳбат давомида пойтахтимизда қад ростлаётган Олимпия шаҳарчасидаги сув спортига ихтисослаштирилган объектни энг замонавий инвентарлар билан жиҳозлаш, унда халқаро мусобақалар ўтказиш, маҳаллий мутахассисларнинг малакасини ошириш каби мавзуларда фикр алмашилди.