Бутунжаҳон якка курашлар ва жанг санъати федерацияси президенти Ўзбекистонга келди

Кеча аввалига Бутунжаҳон Хапкидо Кумдо федерацияси президенти Жанг Хи Чанг тантанали равишда кутиб олинганди. Бугун тунда эса Халқаро W.A.S.C.O, яъни Бутунжаҳон якка курашлар ва жанг санъати федерацияси президенти, профессор Жианни Саритцу ҳам Тошкентга етиб келди. 

Ислом Каримов номидаги Тошкент халқаро аэропортида фахрий меҳмонни тантанали кутиб олиш маросими ташкил этилди. Ўзбекистон таэквондо Миллий Ассоциацияси раиси Лазиз Ҳасанов, Бутунжаҳон Хапкидо Кумдо федерациясининг Марказий Осиё минтақаси президенти Абдулҳаким Шаубаев W.A.S.C.O президентини кутиб олишди. 

Ушбу ташрифдан кўзланган мақсад Ўзбекистоннинг номлари тилга олинган халқаро федерациялари билан ҳамкорлигини янги босқичга олиб чиқиш, юртимизда ушбу яккакураш турлари бўйича Осиё ва жаҳон чемпионатларини ўтказишдан иборат. 

Абдулҳаким Шаубаевнинг хабар беришича, Жанг Хи Чанг ва Жианни Саритцунинг ташрифи Ўзбекистон таэквондо ITF ассоциацияси ҳамда Ўзбекистон Хапкидо федерациялари тарихида янги саҳифанинг очилишига хизмат қилади.