Чарльз Оливейра Махачев - Волкановски жангига ўз тахминини айтди

Енгил вазн тоифасида собиқ UFC чемпиони, бразилиялик Чарльз Оливейра (33-9-1) айни дамда мазкур дивизион чемпиони, россиялик Ислам Махачев (23-1) ва ярименгил вазн чемпиони, австралиялик Алекс Волкановски (25-1) ўртасидаги бўлажак жанг ҳақида ўз фикрлари билан ўртоқлашди. 

"Уларнинг иккиси ҳам буюк жангчилар. Волкановски қўл ва оёқда кучли зарбага эга, Ислам эса рақибини партерга ўтказиб олса, қаттиқ босим қила бошлайди. Менимча, бу жангда Ислам ғалаба қозонади. Агар Алекс "стойка"да жанг қила олса, имкониятлари бўлади", - деди Оливейра.

Эслатиб ўтамиз, Махачев - Волкановски қарама-қаршилиги 2023 йил 11 февраль куни Австралиянинг Перт шаҳрида ўтказиладиган UFC 284 мусобақаси доирасида бўлиб ўтади.

Чарльз сўнгги бор 22 октябрь куни Абу-Даби (БАА)да ташкиллаштирилган UFC 280 турнири доирасида айнан Ислам Махачевга қарши жанг қилиб, мағлуб бўлган эди. Ислам мазкур ғалабаси орқали енгил вазнда айнан Оливейра томонидан вакант бўлиб турган чемпионлик камарини қўлга киритган эди. 

Александр Волкановски эса оҳирги жангини 2 июль куни Лас-Вегас (АҚШ)да ўтказилган UFC 276 мусобақаси доирасида америкалик Макс Холлоуэй (23-7)га қарши ўтказиб, ҳакамларнинг қарори билан ғалаба қозонган ва ўзига тегишли бўлган чемпионлик камарини ҳимоя қилган эди.