"Челси"дан тарихий антирекорд: Лондонликлар бир мавсумда 262 миллион фунт зарар кўришди

2024/25 йилги мавсум якунларига кўра, клубнинг солиқ тўлангунга қадар кўрган зарари 262,4 миллион фунтни ташкил этди. Бу кўрсаткич билан "аристократлар" "Манчестер Сити"нинг 2010/11 йилги мавсумдаги антирекордини (197,5 млн фунт) янгилашди. 

Қизиғи шундаки, клубнинг ўтган мавсумдаги умумий даромади 490,9 миллион фунтни ташкил этган бўлиб, бу клуб тарихидаги иккинчи кўрсаткичдир.

"BBC Sport" хабарига кўра, бундай улкан зарарга бир қанча омиллар сабаб бўлган. Жумладан, Роман Абрамович давридаги қоидабузарликлар учун тўланган 10,75 миллион фунт жарима, шунингдек, Раҳим Стерлингнинг жамоадан кетиши ва Михаил Мудрикнинг четлатилиши билан боғлиқ йўқотишлар ҳисоботга киритилган.

Шунга қарамай, "Челси" АПЛнинг молиявий фейр-плей (PSR) қоидалари доирасида қолмоқда (уч мавсум учун 105 млн фунт зарарга рухсат берилган). Клуб раҳбарияти жорий мавсум якунида рекорд даражада фойда кўришни кутмоқда. Бунга Клублар ўртасидаги Жаҳон чемпионатидаги ғалаба учун бериладиган 85 миллион фунт ва ЕЧЛ трансляцияларидан келадиган 80 миллион фунт яқин даромад асос бўлиши айтилмоқда.