Чимаев Стрикленднинг "треш-ток"лари ҳақида: "Циркдаги масхарабоз"

БАА шарафини ҳимоя қилаётган Хамзат америкалик рақибига нисбатан шахсий адоватни ҳис этмайди ва Шоннинг ўзига қарши айтаётган гапларини жиддий қабул қилмайди.

"Циркка борсанг, у ерда масхарабоз ўйнаса, сенда қандай реакция бўлиши керак? Дўстларим Шонга яқин боришди, у эса уларга: "Биродарлар, мен жанг қилмоқчиман" деди. Мен сохта одамларни ёқтирмайман. Ҳақиқий бўлиш керак. Тўғрисини айтсам, унинг нима қилгани ёки қилмагани менга барибир. Мен қафасга чиқиб, муштлашишим, пулларимни олиб, уйга учиб кетишим, оилам билан бирга бўлишим, онамни кўришим керак", - деди мағлубиятсиз Чимаев.

Шу билан бирга, Стрикленд илгари бир залда машқ қилган Чимаев билан душманлиги сохта эмас, балки ҳақиқий эканлигини таъкидлайди.

"Дрикус мени калтаклаганида, унинг қўлини кўтариб: "Аҳмоқ, сен мени калтакладинг, дедим, аммо Хамзат билан биз ўлгунимизча душман бўлиб қоламиз", - деди америкалик очиқ машғулотдан кейин журналистлар билан бўлиб ўтган суҳбатда.

Хамзат Чимаев ва Шон Стрикленд ўртасида ўрта вазн тоифасидаги чемпионлик жанги 9 май куни Ньюаркда бўлиб ўтадиган UFC 328 турнирининг асосий воқеаси бўлади.