Чирчиқда каратэ-до бўйича халқаро мусобақа ғолиблари аниқланди

Мазкур турнирнинг тантанали ёпилиш маросимида Халқаро карате федерациясининг (ITKF) Осиё ва Океания минтақаси бўйича Президенти Ибраҳим ал-Бакр жаноблари, Ўзбекистон (ITKF) карате-до федерацияси президенти Шуҳрат Кушмуратов ҳамда Университет ректори Рашид Маткаримов қатнашди. 

Ушбу халқаро турнирда жами 300 нафар 6-8 ёш – болалар ва қизлар, 9-13 ёш – ёшлар ва қизлар, 14-18 ёш – ўсмирлар ва ўсмир қизлар, 19-21+ катталар ва аёллар, 40+ фахрийлар иштирок этди. Уч кун давом этган муросасиз беллашувларда барча тоифалар бўйича ғолиблар сараланди. 

Умумий ҳисобда 1-ўрин Тошкент вилояти, 2-ўрин Самарқанд вилояти, 3-ўрин Жиззах вилояти ва Тошкент шаҳри спортчилари жамоаларига насиб этди. 

– Ҳозирда 5 минг нафардан зиёд спортчилар ушбу спорт тури билан шуғулланиб келмоқда, – дейди ITKF каратэ-до Президенти Шуҳрат Кушмуратов. – Ўзбекистон бундан олдин ҳам 1 марта жаҳон ва 4 марта Осиё чемпионатига мезбонлик қилган. Муҳими, бу каби мусобақаларда юртимиз спортчилари маҳоратини кўрсатиб, яхши натижаларни қайд этмоқда. 

– Кейинги йилларда мамлакатимиз спорт соҳасида жаҳон ареналарида катта ютуқларга эришмоқда, – дейди Ўзбекистон Давлат жисмоний тарбия ва спорт университети ректори Рашид Маткаримов. – Албатта, бу юртбошимиз томонидан соҳада яратилаётган шароитлар натижасидир.

Университетимиз ITKF каратэ-до Федерацияси билан ҳамкорликни йўлга қўйди. Келажакда ушбу спорт турининг қамровини янада кенгайтиришда ўз ҳиссамизни қўшамиз деган умиддаман. 

Тантанали тарзда ўтказилган ушбу халқаро турнирнинг ёпилиш маросимида барча ғолиб спортчилар ташкилотчилар томонидан тақдирланди.