Чирчиқда "Тошкент вилояти ҳоким кубоги" мусобақаси ўтказилди

Мусобақанинг тантанали очилиш ва тақдирлаш маросими ташкил этилиб, унда Тошкент вилояти спорт бошқармаси бошлиғи Рустам Бобоқулов, Чирчиқ ОПСТТМ директори Равшан Гафуров, Чирчиқ шаҳар спорт мактаби директори Суҳроб Султонов ва Тошкент вилояти Яккакураш спорт турларига ихтисослашган спорт мактаби директори Дониёр Юсупов иштирок этди.  

Тошкент вилоятининг барча туман ва шаҳарларидан келган 200 нафардан зиёд ёш дзюдочилар кун давомида ғолиблик учун бор маҳоратларини намойиш этишди. Муросасиз беллашувларда Лаззат Эргашева (33 кг. Паркент т.), Перизат Гаухарова (44 кг. Бўстонлиқ т.), Моҳинур Эшқобилова (52 кг. Оҳангарон т.), Асадбек Аҳмаджонов (46 кг. Чирчиқ ш.), Авазбек Ҳайдаров (66 кг. ЧОПСТТМ), Умиджон Абдуқодиров (73 кг. Ангрен ш.) сингари ўғил-қизлар ўз вазн тоифаларида ғолибликка эришди.

Мусобақа якунлангач, барча ғолиб ва совриндорлар диплом, медаль ва эсдалик совғалари билан мукофотланишди. 

— Мазкур мусобақа ўз ўрнида ёш иқтидорларни саралаш вазифасини ўтаб бериши билан ҳам аҳамиятли бўлди,  — дейди дзюдо бўйича Тошкент вилояти терма жамоаси бош мураббийи Авазбек Корганов. — Ортда қолган 2025 йилда шогирдларимиз билан биргаликда мамлакат миқёсидаги  мусобақаларида иштирок этиб, совринли ўринларни эгаллашга муваффақ бўлган эдик. Бу йилги мақсадимиз ҳам "Янги Ўзбекистон олимпия чўққилари" мусобақасининг финал босқичида, Республика чемпионатларида ғолиблар қаторидан жой олиб, дзюдо бўйича миллий терма жамоалар сафига шогирдларимизни иштирокини таъминлаш бўлади.

Илҳом РАҲМОНОВ тайёрлади