Дакар-2022 бекор қилиниши юзасидан МОҚда тезкор йиғилиш ўтказилди

Барча мамлакатлар қатори Ўзбекистон ҳам мазкур мусобақага жиддий ҳозирлик кўраётган эди. ZOOM платформасида ушбу мавзу юзасидан тезкор йиғилиш бўлиб ўтди. Унда МОҚ президенти Рустам Шоабдураҳмонов, Бош котиб Ойбек Касимов, МОҚ президенти маслаҳатчилари ва департамент директорлари қатнашди.

Йиғилишда кадетлар ва ўсмирлар жамоаларининг тайёргарлигини асло сусайтирмаслик, уларга мотивация бериш, бунинг учун тегишли чора-тадбирлар ишлаб чиқиш кун тартибининг асосий масаласи бўлди. Зеро, ҳали олдинда ушбу ёш тоифасидаги спортчилар ўртасида ўтадиган Осиё ва жаҳон чемпионатлари, айниқса, 2021 йил Хитойнинг Шантау шаҳрида ўтадиган ўсмирлар Осиё ўйинларининг ҳам ўтказилиши сўроқ остида турибди.

Маълумки, Дакар-2022 учун тайёрланаётган авлод катталар терма жамоаси учун муносиб захира, спортимиз, келажагимиз эртаси ҳисобланади. Шу боис ҳам бу авлодни яхши спорт формасида ушлаб туриш, уларни келажакдаги халқаро мусобақаларга тайёрлаш ва кучли атлет қилиб тарбиялаш олдинда турган асосий вазифалардан бирига айланади. Бугунги йиғилишда бу борада юзага келиши мумкин бўлган муаммоларни бартараф этиш, ёш авлод учун турли мусобақалар ташкил қилиш орқали уларни профессионал спортчи қилиб тарбиялаш борасида фикр-мулоҳазалар ўртага ташланди.

Онлайн учрашув якунида мазкур йўналиш бўйича Жисмоний тарбия ва спорт вазирлиги билан ҳамкорликда барча йўналишларни қамраб оладиган “Йўл харитаси” ишлаб чиқилиши келишиб олинди.