Денис Истомин Питер турнири яккалигида кортга чиқди

Ушбу мусобақада мамлакатимизнинг биринчи ракеткаси Денис Истомин ҳам иштирок этяпти. Ҳамюртимиз жуфтлик мусобақасидаги иштирокини ғалаба билан бошлаган эди. Бугун Денис яккаликнинг илк даврасида кортга чиқди. 

Ҳамюртимиз қозоғистонлик Михаил Кукушкин билан муносабатларига ойдинлик киритиб олди. Биринчи сет 7:5 ҳисобида Кукушкин фойдасига ҳал бўлди. Иккинчи сетнинг олтинчи геймидан сўнг Истомин баҳсни давом эттира олмаслигини маълум қилди. Бу пайтга келиб Денис 4:2 ҳисобида олдинда бораётганди.

Шу тариқа, ҳамюртимиз Санкт-Петербург турниридаги иштирокини якунлади. Денис Истомин дунё рейтингида 61, Михаил Кукушкин эса 87-ўринни эгаллаб турганди. Теннисчилар шу кунгача ўзаро 9 маротаба тўқнаш келишган. Кукушкин бугун бешинчи ғалабасини тантана қилди.