Деонтей Уайлдер: “Бу сафар Стиверн билан жанг муддатидан олдин якунланади”

Аслида Уайлдер кубалик Луис Ортисга қарши рингга кўтарилиши керак эди. Лекин Ортис допинг-текширувдан ўта олмаганлиги учун жанг бекор қилинган, кубаликнинг ўзи номаълум муддатга бокс фаолиятидан четлатилганди.

“Стиверн анчадан бери мендан ушбу жангни сўраб келаётганди. Ниҳоят, унга ушбу имкониятни тақдим этдик. Бермейн билан илк жангимизда очколар ҳисобига кўра ғалаба қозонгандим. Ўшанда учинчи раундда қўлимни синдириб олган эдим.

Лекин жангни тўхтатмагандим. Бу сафар ҳаммаси бошқача бўлади. Жанг аниқ 12 раунд давом этмайди. Мен Стивернни муддатидан аввал мағлуб этаман. Бу умуман бошқача жанг бўлади”, - деди Деонтей.

Маълумот учун, боксчилар иккинчи бор тўқнаш келишади. 2015 йилнинг январь ойида бўлиб ўтган жангда Уайлдер очколар ҳисобига кўра ғалаба қозонган ва WBC чемпионлик камарини қўлга киритганди.