Диллиан Уайт собиқ жаҳон чемпионини мағлуб этди

Оқшомнинг марказий жанги супероғир вазн тоифасида ўтказилиб, унда собиқ жаҳон чемпиони Жозеф Паркер (24-2, 18 КО) британиялик Диллиан Уайт (24-1, 17 КО)га қарши рингга кўтарилди. 

Ўн икки раундга мўлжалланган жангда сезиларли ташаббусга эга бўлган Уайт якунда рақибини очколар ҳисобига кўра мағлуб этди. Уччала ҳакам ҳам бир овоздан 113-111, 115-110, 114-111 ҳисобидаги ғалабани Уайтга беришди. 

Эътиборлиси, жангнинг иккинчи ва саккизинчи раундларида Диллиан рақибини икки бор нокдаун ҳолатига тушириб қўйди. Ўн иккинчи раундда эса унинг ўзи нокдаунга тушиб қолди, лекин баҳс якунига қадар оёқда тура олди. 

Ушбу ғалаба эвазига Уайт WBC Silver чемпионлик камарини ўзида сақлаб қолиш баробарида вакант бўлиб турган WBO International камарини ҳам қўлга киритди.