Доҳада IJF Конгресси ўтказилди. Лиза Аллан ташкилотнинг янги Бош котиби!

Ҳар икки йилда бир маротаба ўтказиладиган тадбирда IJFга аъзо барча давлат делегациялари вакиллари иштирок этишди. Улар қаторида Ўзбекистон дзюдо федерацияси бош котиби Азиз Собиров ва халқаро бўлим етакчи мутахассиси Олимхон Маҳмудмуродов ҳам бор эди. 

Конгрессда сўнгги икки йил давомида ташкилот томонидан амалга оширилган ишлар сарҳисоб қилинди. Молиявий ҳисобот топширилди. Кейинги икки йил учун мўлжалланган режаларга тўхталиб ўтилди. Бундан ташқари, ташкилот бош котиби ва бош ғазначиси лавозимларига сайловлар ҳам бўлиб ўтди.

Узоқ йиллар IJF бош котиби лавозимида ишлаб келган франциялик Жан-Люк Руженинг ўрнига доктор Лиза Аллан делегатлар томонидан бир овоздан ташкилотнинг янги бош котиби этиб сайланди. Руже IJF Ижроия қўмитасидаги фаолиятини давом эттиради.   

"Номзодимни қўллаб-қувватлаганлар ва менга ишонч билдирганлардан миннатдорман. Бу ишончни оқлаш учун астойдил ҳаракат қиламан", - деди Аллан хоним.  

Конгресс давомида Насер Ал Тамими ташкилот бош ғазначиси этиб қайта сайланди.