Дунёнинг 830-ракеткаси қайтишини ғалаба билан нишонлади

Айни пайтда WTA рейтингида 830-поғонадан жой олган Петра Квитова қайтишини чиройли ғалаба билан қарши олди. Чехиялик теннисчи илк даврада рейтингда ўзидан деярли 800 поғона юқорида бораётган руминиялик Ирина-Камелия Бегуни мағлубиятга учратди - 7/5, 6/1.

Петра теннисчиларнинг ўзаро учрашувларида катта фарқ билан олдинда бормоқда - 7:1. Тўқсон етти дақиқа давом этган баҳсда иккала теннис маликаси ҳам 2 тадан эйс зарбасини амалга оширган. Қўшхатолар Бегуда кўпроқ бўлди - 5 га 1. Брейклар бўйича эса Квитова 5 га 1 кўринишида устунлик қилди. 

Маълумот учун, 35 ёшли Квитова бешта мағлубиятдан иборат ёқимсиз сериясига барҳам берди. У сўнгги бор 2023 йилнинг октябрида ғалаба қозонганди. Орада фарзандли бўлди. Энди Уимблдон турнирининг икки карра ғолибаси иккинчи даврада тунислик Онс Жаберга қарши кортга чиқади.