Дунёнинг энг ёш биринчи ракетка маликаларини танийсизми? (ТОП-10)

Эътиборингизга энг ёш ракетка маликалари Топ-10 лигини тақдим этамиз. 

Хабарингиз бор, Майами "Мастерс"ида чемпионликни қўлга киритган польшалик Ига Свёнтек турнирдан сўнг сайёрамизнинг биринчи ракеткасига айланди. Табиийки мухлис ва мутахассислар унинг ёш бўлсада биринчи ракетка бўлганига қойил қолишди. Аммо у энг ёш биринчи ракеткага айланган теннисчилар рўйхатида юқори поғонадан ҳам жой олмади. Сабаби ҳали ўсмирлигидаёқ жаҳон теннисини ларзага солиб, дунёнинг биринчи ракетка маликасига айланган теннисчилар талайгина. Ига Свёнтек эса Топ-10'ни якунлаб берди холос. Баъзи теннисчилар 16-20 ёшида дунё теннис жамоатчилигини лол қолдираётган бир вақтда бизнинг ёш маликаларимиз рейтингга кира олишмаяпти ҳам. Ҳа, майли мавзуга қайтамиз, Демак, Топ-10 билан танишинг:

Мартина Хингис (Швейцария)

Дунёнинг энг ёш биринчи ракеткаси - швейцариялик Мартина Хингис бўлиб, теннисчи 16 ёш, 1 ой ва 1 кунлигида биринчи марта жаҳоннинг биринчи ракеткасига айланган. Ҳаммаси бўлиб, у 209 ҳафта давомида WTA рейтинги етакчиси бўлган (тарихдаги 5-кўрсаткич).

Мартина Хингис 1980 йил 30 сентябрда Словакияда таваллуд топган. "Катта Дубулға" турнирларининг беш карра чемпиони, Australian Open'да уч бор, US Open ва Уимблдонда бир маротаба ғолибга айланган. Теннисчи фақатгина US Open'да зафар қучмаган. Хингис карьерасини 2017 йилнинг 28 октабрида якунлаган. 

Моника Селеш (Югославия/АҚШ)

1990 йиллар бошида 17 ёш 3 ой 9 кунлигида дунёнинг биринчи ракеткаси бўлди. Ҳаммаси бўлиб, у 178 ҳафта давомида энг юқори поғонада рейтингни бошқарди (6-кўрсаткич). 1973 йилнинг 2 декабрида таваллуд топган теннисчи фаолияти давомида "Катта Дубулға" турнирларида 9 маротаба ғолибликни тантана қилган. У 4 маротаба Australian Open, 3 бор "Ролан Гаррос" ва 2 марта US Оpen чемпионлигини қўлга киритган. Моника Селеш 2008 йилда фаолиятини якунлаган. 

Трэйси Остин (АҚШ)

Америкалик теннисчи биринчи марта 17 ёш, 3 ой ва 26 кунлигида рейтингда биринчи ўринни эгаллади. Ҳаммаси бўлиб у 21 ҳафта давомида пешқадамлик қилди.

Трэйси Остин 1962 йилда АҚШнинг Калифорния Штатида дунёга келган. Фаолияти давомида 2 бор мамлакати мезбонлигидаги US Open чемпионлигини қўлга киритган (1979, 1981). Теннисчи 1994 йилнинг июль ойида фаолиятини якунлаганини маълум қилган.

Штеффи Граф (Германия)

Германиялик теннисчи биринчи марта 18 ёш, 2 ойлигу 3 кунлигида жаҳон рейтингида етакчига айланди. У яккалик баҳсларида "Катта Дубулға"нинг 22 та унвонига эга. Граф жами 377 ҳафта рейтингда етакчилик (аёллар ва эркаклар теннисида мутлақ рекорд) қилган.

Штеффи Графни ХХ асрнинг энг буюк теннисчиси дейиш мумкин. У "Катта Дубулға" турнирларининг 22 карра чемпиони ҳисобланади. Граф 4 бор Australian Open, 6 бор "Роллан Гаррос", 7 марта Уимблдон ва 5 бор US Open чемпионлигини қўлга киритган. Унинг ҳисобида "Катта Дубулға" турнирларининг жуфтлик баҳсларидаги битта унвон ҳам бор (Уимблдон). 

Германиялик теннисчи 1999 йилда фаолиятини якунлаган. 

Мария Шарапова (Россия)

Россиялик теннисчи кучли бешликда. 1987 йилнинг 19 апрелида таваллуд топган теннисчи 18 ёшу 4 ой 3 кунлигида Уимблдон 2004'даги ғалабасидан бир йил ўтиб дунёнинг биринчи ракеткаси бўлди. У 21 ҳафта давомида рейтингни бошқарди. Мария 5 карра "Катта Дубулға" турнирлари ғолибаси ҳисобланади. У "Улкан Тож" турнирларининг барчасида чемпионликни қўлга киритган. Фақатгина "Роллан Гаррос"да икки бор зафар қучган. Шарапова 2020 йил 33 ёшида проффесионал фаолиятини якунлади. 

Ким Клейстерс (Бельгия)Ким 1983 йилда дунёга келган. Теннисчи 20 ёшу 2 ойлик 3 кунлигида фаолиятида ҳали "Катта Дубулға" турнирини ютмасдан дунёнинг 1-рақамли теннисчисига айланди. Бироқ, кейинчалик бельгиялик спортчи 4 маротаба "Катта Дубулға" турнирларида ғалаба қозонди. Унга "Улкан Тож"даги илк унвон 28 ёшида насиб этди. У Australian Open'да бир бор, US Open'да уч марта чемпион деган номга сазовор бўлди.

Каролин Возняцки (Дания)1990 йилда таваллуд топган. Даниялик спортчи 20 ёшу 3 ойлигида рейтингда биринчи ўринни эгаллади. Бу вақтда унда "Катта Дубулға" турнири чемпионлиги йўқ эди. Фақатгина 8 йилдан сўнг, 2018 йилда Australian Open'да у ўзининг ягона "Улкан Тож"даги титулини қўлга киритди. Каролин жами 71 ҳафта давомида WTA рейтингини бошқарган. Теннисчи 2020 йилда фаолиятини якунлади. 

Ана Иванович (Сербия)

Ана Иванович 1987 йилда дунёга келган. Сербиялик теннисчи "Ролан Гаррос" - 2008'да зафар қучиб, 20 ёшу, 7 ойлик ва 3 кунлигида дунёнинг биринчи ракеткаси бўлди. У жами 12 ҳафта давомида рейтингнинг энг юқори поғонасида бўлган. Иванович 2016 йилда фаолиятини якунлади. Яна бир маълумот, Ана Иванович германиялик машҳур футболчи Бастиан Швайнштайгернинг рафиқаси ҳисобланади. Ҳозирда жуфтлик икки ўғилни тарбиялаб, вояга етказмоқда.

Серена Уильямс (АҚШ)

1981 йилда таваллуд топган теннисчи улкан натижалар соҳибаси ҳисобланади. Серена 2002 йилда 20 ёшу 9 ойлик 12 кунлигида WТА рейтингида биринчи ўринни эгаллади. Ҳаммаси бўлиб, у 319 ҳафта давомида сайёрамизнинг биринчи ракеткаси сифатида "тахт"ни ҳеч кимга бермай келди (тарихдаги 3-ўрин). Серенанинг буюк натижаси албатта "Улкан Тож" турнирларидаги 23 та унвондир. Кичик Уильямс 7 бор Australian Open, 3 марта "Роллан Гаррос", 7 бор Уимблдон ва 6 маротаба US Open ғолибаси бўлган. Серена шунингдек, "Катта Дубулға" турнирларининг жуфтлик баҳсларида 14 бор чемпион бўлган. 

Ва Топ-10'нинг охирги поғонасида 4 апрель куни сайёрамизнинг биринчи ракеткасига айланган Ига Свёнтек жойлашди. 

Ига Свёнтек (Польша)

Ига 2001 йилнинг 31 майида Польшада дунёга келган. Теннисчи 20 ёшу 10 ойлик ва 4 кунлигида жаҳоннинг биринчи ракеткаси бўлди. У рейтингда биринчи ўринни эгаллаган биринчи польшалик теннисчидир. Свёнтекда "Катта Дубулға" турнирларидаги битта унвон бор. У 19 ёшида "Ролан Гаррос" чемпионига айланган.