Дуродола Мага Исмаиловдан 2 кг оғирроқ тош босди + ФОТО

AMC Fight Nights байроғи остидаги аралаш яккакураш турнирларида иштирок этиб келган Мага Исмаилов бугун ўзини профессионал боксда синаб кўради. Унинг рақиби нигериялик Оланреваджу Дуродола бўлади. Полиция ходими бўлган Дуродола ҳаваскор боксда Пекин Олимпиадасида иштирок этган. 

Бугунги жанг олдидан боксчилар тарозидан ўтиш маросимида ҳозир бўлишди. Нигериялик 93.8 килограмм тош босган бўлса, Мага Исмаилов рақибидан 2 кг енгил чиқди. 35 ёшли Магомед Исмаилов бундан аввалги жангида AMC Fight Nights чемпиони Владимир Минеевга ютқазиб қўйган эди. Унгача у 12 та жангда мағлубиятга учрамаганди. 

41 ёшли Оланреваджу Дуродола эса сўнгги бор ўтган йилнинг ноябрь ойида рингга чиққан ва ўшанда британиялик Ричард Риакпорга бешинчи раундда техник нокаут билан имкониятни бой берган. Мага Исмаилов - Оланреваджу Дуродола жанги биринчи оғир вазн тоифасидаги вакант бўлиб турган WBC Silver камари учун кечади.