Дзюдо. Энди бор эътибор Жаҳон чемпионатига қаратилади

Ушбу мусобақа дзюдо ватани - Японияда ўтказилади. 25-31 август кунлари Токио шаҳрида келаси йили ушбу мамлакатда ўтказилувчи Олимпия ўйинларига энг катта рейтинг очкосини бериши билан аҳамиятли бўлган дунё биринчилиги ташкил этилади. 

Жаҳон чемпионатида сайёрамизнинг 5 қитъаси, 141 давлатидан жами 835 нафар (506 эркак, 329 аёл) дзюдочи мусобақа медаллари ҳам Олимпиаданинг муҳим рейтинг очколари учун татамига чиқади.

Эркаклар -60, -66, -73, -81, -90, -100, +100 кг, аёллар эса -48, -52, -57, -63, -70, -78 ҳамда +78 кг вазн тоифаларида баҳсларга киришади. Жаҳон чемпионати қитъавий чемпионатлар, Гран-при, "Катта Дубулға" ва "Мастерс" сериясига кирувчи турнирлар орасида энг кўп очко бериши билан аҳамиятли бўлган мусобақа ҳисобланади. 

Жаҳон чемпионлари 2000 рейтинг очкосини қўлга киритади. Кумуш медаль соҳиблари 1400, бронза медаль эгалари эса 1000 рейтинг очкосига эга бўлади. Бешинчи ўрин эгалари 720, еттинчи поғонадан жой олганлар 520 очкони расмийлаштиради. Кейинги ўринлар билан кифояланган дзюдочилар мос равишда 320, 240 ва 200 рейтинг очкосини ўз ҳисобларига ёзиб қўйишади.   

Ўзбекистон дзюдо федерацияси матбуот хизмати