Дзюдо. Жаҳон чемпионатида ҳеч бўлмаса гуруҳдан чиқамизми?

Сайёрамизнинг 131 мамлакатидан 800 нафарга яқин спортчи иштирок этаётган йилнинг нуфузли мусобақасида ўзбекистонлик полвонлар ҳам ўз имкониятларини синовдан ўтказишяпти. Лекин шу кунгача ўтказилган баҳсларда ҳеч бир дзюдочимизга хатто гуруҳдан чиқиш ҳам насиб этмади.

Кеча эркаклар -100, қизлар эса -78 кг вазн тоифасида татамига чиқишди. Муҳаммадкарим Хуррамов илк даврада сенегаллик Баэ Диаварра, кейин канадалик Кайл Рейесни мағлуб этди. Учинчи босқичда эса мисрлик Рамадан Дарвишга ютқазди. 

Шерали Жўраев эса биринчи учрашувидаёқ эстониялик Григори Минаскинга имкониятни бой берди. Нодира Йўлдошева польшалик Бита Пакутнинг синовидан ўта олмади. Бугун эркаклар +100, аёллар эса +78 кг вазн тоифасида татамига чиқишади.