Дзюдо. Жаҳон чемпионатидаги энг яхши натижамиз 5-ўрин бўлди

Сайёрамизнинг 124 мамлакати спортчилари қаторида ўзбекистонлик полвонлар ҳам жаҳон чемпионати медаллари ҳамда Токио Олимпиадасининг муҳим рейтинг очколари учун баҳслашишди. 

Афсуски, Боку татамилари ҳамюртларимиз учун омадсиз келди. Ўтказилган баҳслардаги энг яхши натижамиз 5-ўрин бўлди. Бу натижага ҳам кеча эришдик. Энг оғир +100 кг вазн тоифасида татамига чиққан Бекмурод Олтибоев гуруҳ босқичини муваффақиятли якунлади. 

У анча таниқли бўлган бразилиялик полвон Дэвид Моура, қозоғистонлик Ерасил Кажибаев, тожикистонлик Темур Раҳимовни мағлуб этиб, ярим финалга йўл олди. Аммо, Бекмурод финал остонасида озарбайжонлик Ушанги Кокаурига ютқазиб қўйди. Бронза медали учун кечган баҳсда эса япониялик Хисаёши Харасавага имкониятни бой берди. Айнан Олтибоев жаҳон чемпионатининг гуруҳ босқичини муваффақиятли якунлаган ягона дзюдочимиз бўлди.