Дзюдо. Жаҳон чемпионатидаги омадсиз серия давом этади

Сайёрамизнинг 131 мамлакатидан 800 нафарга яқин спортчи иштирок этаётган йилнинг нуфузли мусобақасида ўзбекистонлик полвонлар ҳам ўз имкониятларини синовдан ўтказишяпти. Лекин шу кунгача ўтказилган баҳсларда ҳеч бир дзюдочимизга хатто гуруҳдан чиқиш насиб этмади.

-70 кг вазн тоифасидаги хотин-қиз дзюдочилар баҳсида икки спортчимиз татамига чиқди ва уларнинг ҳар иккиси ҳам илк учрашувдаёқ мағлубият аламини тотиб кўришди. Шоҳиста Назарова польшалик Даря Погорзелечга, тажрибали Гулноза Матниёзова эса япониялик Йоко Онога ютқазиб қўйди. 

-90 кг вазндаги полвонимиз Давлат Бобонов ўз иштирокини тўғридан-тўғри иккинчи босқичдан бошлади ва голландиялик Ван Енд Ноэлга имкониятни бой берди. Бу вазнда испаниялик Николоз Шеразадашвили жаҳон чемпиони бўлди. 

Бугун эркаклар -100, қизлар -78 кг вазн тоифасида татамига чиқишади. Муҳаммадкарим Хуррамов илк даврада сенегаллик Баэ Диаваррага, Шерали Жўраев эстониялик Григори Минаскинга қарши баҳс олиб боради. Нодира Йўлдошева польшалик Бита Пакут синовидан ўтади.