Дзюдо. Жаҳон чемпионатидаги омадсиз юриш давом этади, гуруҳдан ҳам чиқа олмаяпмиз

Сайёрамизнинг 131 мамлакатидан 800 нафарга яқин спортчи иштирок этаётган йилнинг нуфузли мусобақасида ўзбекистонлик полвонлар ҳам ўз имкониятларини синовдан ўтказишяпти. 

Афсуски, жаҳон чемпионатининг бугунги баҳслари ҳам худди биринчи ва иккинчи кунда бўлгани каби ўта омадсиз келди. -73 кг вазн тоифасида бир йўла икки дзюдочимиз татамига чиқди. Ҳикматуллоҳ Тўраев грециялик Георгиос Азоидисни мағлуб этди. Лекин кейинги беллашувида мўғулистонлик Одбайар Ганбаатарга имкониятни бой берди. 

Бу вазндаги иккинчи полвонимиз Ғиёсжон Бобоев эса илк учрашувидаёқ тожикистонлик Сомон Маҳмадбековга ютқазиб қўйди. -57 кг вазндаги қизимиз Амина Мамедова илк босқичда кореялик Ю Жеонг Квонга йўлни бўшатиб берди.

Шу кунгача Сардор Нуруллаев, Гулноза Зияева, Шарофиддин Лутфуллаев, Маржона Салоҳиддиновалар мағлубиятга учраб, мухлислар қаторидан жой олишган эди.