Дзюдо. «Олимпия келажаги» мусобақалари старт олмоқда

28-29 апрель кунлари Қашқадарёда дзюдо бўйича мусобақанинг ҳудудий беллашувларига старт берилади. Унда «С» гуруҳида Қашқадарё, Сурхондарё ва Навоий вилоят терма жамоалари ўзаро кураш олиб борадилар. Қайд этиб ўтиш лозимки, улар орасидан фақатгина битта жамоа ҳал қилувчи финал босқичида қатнашиш ҳуқуқини қўлга киритади.

Эслатиб ўтамиз, республика бўйича мусобақалар тўртта минтақага ажратилган ҳолда ташкил этилади. «А» гуруҳида Андижон, Наманган, Фарғона ва Тошкент вилояти терма жамоалари баҳс юритсалар, «B» гуруҳида Тошкент шаҳри, Сирдарё, Самарқанд ва Жиззах вилоятлари терма жамоалари финал йўлланмаси учун кураш олиб борадилар. «D» гуруҳида эса Қорақалпоғистон Республикаси, Хоразм ва Бухоро вилояти терма жамоалари ўртасида мусобақалар ташкил қилинади.

6-7 октябрь кунлари бўлиб ўтадиган финал беллашувларига Термиз шаҳри мезбонлик қилади.

Миллий олимпия қўмитаси ташаббуси билан асос солинган «Олимпия келажаги» мусобақаларини ташкил қилишдан кўзланган асосий мақсад – ёш ва иқтидорли спортчиларни саралаб олиш, жойларда спортнинг оммавийлигини ошириш, ҳудудий терма жамоаларни шакллантириш ва ўқув-машғулот базалари ҳолатини яхшилашга қаратилгандир.

Мусобақаларнинг тўлиқ тақвими Миллий олимпия қўмитасининг расмий сайти орқали эълон қилиб борилади.