Дзюдо. Осиё чемпионатида 2 та бронза қўлга киритилди

Хабар берганимиздек, куннинг биринчи ярмида ўтказилган баҳслар якунига кўра, 5 нафар дзюдочимиз бронза медали учун кураш олиб бориши маълум бўлганди.

Улардан икки нафари ўтиш баҳсларида муваффақиятга эришиб, якунда бронза медали билан тақдирланишди. Эркаклар ўртасидаги -90 кг вазн тоифасидаги баҳсларда иштирок этган Муҳаммадкарим Ҳуррамов бронза медалини қўлга киритди.

Ҳуррамов ўтиш беллашувида эронлик Воҳид Нурини мағлубиятга учратди. Бронза учун кечган баҳсда эса кореялик Донг Хан Гвакдан устун келди. Яна бир бронза медалига Муҳриддин Тиловов эгалик қилди.

Муҳриддин бронза йўлида аввалига Шимолий Корея вакили Йонг Жае Анни, кейин эса тожикистонлик Суҳроб Боқиевни таслим этди. Ўзбекистон терма жамоаси умумжамоа ҳисобида 29 давлат орасида 8-ўринни эгаллаб турибди.