Дзюдо. Ёшларимиз Осиё чемпионатида 10 та медал билан тўртинчи бўлишди

Қитъамизнинг 17 давлати дзюдочилари қаторида юртимиз спортчилари ҳам Осиё чемпионати медаллари учун татамига чиқишди. Мусобақанинг биринчи куни терма жамоамиз аъзолари жами 8 та медални қўлга киритишганди. Иккинчи кунги баҳсларда эса дзюдочиларимиз 2 та медал билан кифояланишди.

Ўнта медалдан иккитаси олтин бўлиб, катталар терма жамоаси бош мураббийи Андрей Штурбабиннинг ўғли Артём -66 кг вазнда барча рақибларини мағлубиятга учратиб, Осиё чемпионига айланди.

Терма жамоамизга иккинчи олтин медални -73 кг вазнда татамига чиққан Мусо Собиров тақдим этди. У финалда мўғулистонлик Батболд Булганни муддатидан аввал мағлубиятга учратди.

Ҳамюртларимиздан Шермуҳаммад Жандреев, Манучер Ширинов, Беҳруз Амандавлатов, Гулнур Муратбаева ва Санобар Султонова кумуш медални қўлга киритди. Алишер Юсупов, Кимё Марасулова ва Кемран Нуруллаев бронза медали билан тақдирланди.

Осиё чемпионати якунида терма жамоамиз 10 та медал билан умумжамоа ҳисобида тўртинчи ўринни банд этишди. Ҳисобида 5 та олтин, 6 та бронза медали бўлган дзюдо ватани Япония терма жамоаси умумжамоа ҳисобида биринчи ўринни эгаллади.