Дзюдо. Ёшларимизда Осиё чемпионатининг илк куни 8та медал!

Қитъамизнинг 17 давлати дзюдочилари қаторида юртимиз спортчилари ҳам Осиё чемпионати медаллари учун татамига чиқишяпти. Кеча мусобақанинг биринчи куни терма жамоамиз аъзолари жами 8 та медал қўлга киритишди.

Шулардан иккитаси олтин медаллардир. Катталар терма жамоаси бош мураббийи Андрей Штурбабиннинг ўғли Артём -66 кг вазнда барча рақибларини мағлубиятга учратиб, Осиё чемпионига айланди. Штурбабин ярим финалда япониялик Кенши Харада, финалда эса эронлик Алиризо Хўжастехни мағлуб этди.

Терма жамоамизга иккинчи олтин медални -73 кг вазнда татамига чиққан Мусо Собиров тақдим этди. У финалда мўғулистонлик Батболд Булганни муддатидан аввал мағлубиятга учратди.

Ҳамюртларимиздан Манучер Ширинов, Беҳруз Амандавлатов, Гулнур Муратбаева ва Санобар Султонова кумуш медални қўлга киритди. Кимё Марасулова ва Кемран Нуруллаев бронза медали билан тақдирланди.

Ҳозирча умумжамоа ҳисобида дзюдочиларимиз 8 та медал билан иккинчи ўринни банд этишган. Ҳисобида бизга нисбатан битта олтин медал кўп бўлган дзюдо ватани Япония терма жамоаси умумжамоа ҳисобида биринчи ўринни эгаллаб турибди.